EV Industry and Related Career Opportunities
Date : 14/06/2022
EV Industry and Related Career Opportunities
Agar Niti Aayog ki maane toh 2030 tak EV industry Bharat mai lagbhag 1 crore naye rozgaar paida karne jaa rahi hai. Electric Vehicle ki yeh leher skilled aur unskilled workers ke liye jaise umeed ki nai kiran lekar aayi hai.
Yeh baat sunne mein achi toh bohot lagi hogi… Par yeh EV hai kis chidiya ka naam? Kaise aur kahan aapko is industry mein job mil sakti hai?
Chaliye jaante hain…
Toh EV – jise Electric Vehicle bola jata hai, yeh voh vahan ya gaadiyan hoti hain jo petrol or diesel ki jagah sirf electricity ya electric battery par chalti hain. Jaise aapne dekhe honge e-rickshaw jo battery se chalte hain.
Aise hi bohot saari companies E-Scooter, E-Car aur E-Bus lekar ab market mein aa rahi hain. Petrol aur Diesel se badhti mehangai aur pollution ko dekhte hue yeh ek acha aur mehtavpurn badlaav hai. Puri duniya ke saath, Bharat bhi ab EV ki aur kadam badha raha hai.
Bharat sarkar ka lakshay hai automotive industry mai India ko 2030 tak duniya mein teesra sthan prapt karana aur 100% electric vehicle istemal karne wala desh banna. Yeh tabhi mumkin hai jab tezi se EV production ke liye nayi factriyan aur utpadan shetra banein.
Aaj ke time par bahut saari private companiyan aur government sansthaye is industry ko kamyab banane mai lagi hui hain. Jiske chalte hue EV manufacturing unit, EV charging station se leke service, maintenance aur repair ke liye ab blue and grey collar workforce ki demand badhti ja rahi hai. Toh yeh cheez sirf environment matlab paryavaran ke liye hi nhi balki humare shramik bhai beheno ke rozgaar ke liye bhi bahut achi pehel hai.
EV sector mein job paane ke liye do important branch ya trade hain jinki sabse zyada demand badh rahi hai. Ek hai electrical aur dusra mechanical. Pehle automobile industry mai electrical parts ki utni zaroorat nahi hoti thi. Par jab se automobile petrol/diesel engine; motor aur battery system mai badal raha hai, tabse electrical technicians aur skilled workforce ki demand EV sector mein bahut jyada badh gayi hai.
Aaiye ab hum EV sector mein job/career opportunities ki baat karte hain?
(1) EV factories jisme mein bahut se trades ke workers ki
zaroorat hai –
Jaise factory assembly line mein components assemble karne ke liye ITI electrician, welder, cutter, fitter, production worker, tool and die maker, jaise
workers ki zaroorat rehti hai.
Battery units jaise vibhag mai chemical aur electrochemical trade mein ITI ya
Diploma ke logon ki zaroorat rehti hai. Tata Chemicals, Maruti Suzuki, Hero
Motocorp jaisi companiyan electric vehicle mai lagne wali Lithium-Ion battery ka
utpadan karne ka plan kar rahi hain.
Sub-component / Motor units ya ancillary unit mein, machinist, controller aur
computer operator ki zaroorat rehti hai jisko manufacturing unit ki machine
chalane ki knowledge aur experience ho.
Job ke liye aap bahut saari companiyon mein apply kar sakte hain. Kuch naam
mein aapke saath share kar raha hoon. Jaise –
- Ola Electric (bangalore)
- Okinawa (Rajasthan)
- Mahindra Electric Vehicle (Bangalore aur Pune)
- MG motors (Gujarat)
- Ather Energy (Bangalore)
- Ashok Leyland (Rajasthan aur Tamil Nadu)
(2) EV service, repair aur maintenance work, jahan technician aur repair workers ki sabse zyada demand hai. Yahan workers ka kaam gaadiyon ki service, repair aur battery badalne se lekar nayi batteries install karne ka hota hai. Is kaam ke liye, skilled electrical repair workers ki zaroorat hai jo battery system aur electrical system ki achhi knowledge rakhte hon.
Filhal, app job ke liye EV banane wali companiyon ke service center mein aur
uske alawa Hyderabad ki Racenergy (रेस एनज), Bangalore mein Volta
Automotive, New Delhi mein Folks Motor jaisi companies mein apply kar sakte
hain jo petrol car se EV car mein badalne ka kaam kar rahi hain.
(3) EV charging station ka kaam, jiska poore Bharat mein network lagane ka lakshay hai. Iski madad se log kahin bhi apne electric vehicle charge kar sakenge. Isme Draughtsman charging station ka plan banane ke liye, powerline workers aur installers power grid aur power line pe kaam karne ke liye chahiye. Aur sath hi kuch electricians ki zaroorat reheti hai jo battery charging, badalne aur maintenance ka system banane mai madad kar saken.
Tata Power is samay India ke 9 states mein pehle hi EV charging stations laga
chukki hai. Aur bhi companiyan hain jaise ABB India, Panasonic, BrightBlu,
Charzer jo charging station laga rahe hain jagha jagha, jisme aap job ke liye
apply kar sakte hain.
Yeh EV charging stations sirf bade shehron mein hi nahi balki tier 2 aur tier 3 yaani chote sheron aur kasbon mein bhi lagaye ja raha hai. Toh aap anumaan laga sakte hain kitni new jobs paida hone ja rahi hain aane wale samay mein.
Toh aap soch kya rahe hain? Yahi samay hai apne aap ko kushal banayein aur EV
sector mein job paane ke liye tayari karein . Kyunki filhaal skilled workers ki kafi zyada kami hai EV industry mai.
Toh doston, yahi samay hai mauka dekh kar chauka marne ka apne career mein, kyunki EV industry abhi apne shuruwati daur mein hai, jisme naukri paane ka abhi mauka asani se mil sakta hai.
Freshers jo abhi koi vocational course ya ITI mai padh rahe hain voh iss samay ka pura upyog kar sakte hain kisi Aprentinceship (Checkout latest Apprenticeship opportunities here) ya project ka hissa banke. Kyunki direct industry experience aur knowledge hi freshers ke kaam ayega EV industry mai naukri paane ke liye.
Experienced log jo industry mai kafi saal se kaam kar rahe hain, unke liye EV ek naya career opportunities path ban sakta hai. Industry mein dekha jaaye toh experienced logon ki zyada demand hai, kyunki woh apne saath automobile industry ka experience aur uss kshetra ki knowledge apne saath lekar aate hain. Bas zaroorat hai to thoda upskilling ki, naye daur ke hissab se dhalne ki. Apni skills ko upgrade karen aur EV sector mein job lene ke kabil banein.
Aur jankaari paane ke liye aap humein comment section par jaa kar apne sawal likh kar bhej dein. Hum aapke sawalon ke jawab dene ka prayas karenge.
Also Read :
Job Opportunities In Solar Energy Sector
Indian Hospitality Industry And Its Related Career Opportunities